Gota ndoenda.

Gota ndoenda.

Mwedzi wachena, Wachena semukaka. Makomo oitawo mawungira, Padare izwi rotaurawo zvine chihuru. Gota roita duku, husiku hworeba. Gudza harichafukidze moyo, podiwawo chimhanyisaropa. Ndasimudza musoro semhungu, Ndatarira sango rizere mhembwe. Vakuru voti," Zingizi gonyera pamwe, maruva enyika haapere" Ini ndosarura hangu ruva reimba yaMachuwa. Ndatarira hachi rasvika, ndikanzwa kuzipirwa kwemoyo. Rasvika, kunge nzungu dzakarimirwa pachuru dzikadiridzirwa neyaNyadenga. Rine muswe unoyevedza kunge ngarikuni nechipfuva chinenge mapudzi ekwaMutoko. Meso angu sandiwo ega anoona nekupenyerwa nemhembwe iyi, Ropa rangu harisiriro rega rinomhanya mhanya sehuku yachekwa musoro. Rudhende rwese rwamera ndebvu rwotoisa misungo musango. Ndoitawo hwetsine mhayi, vamwe ndoenda navo kunotsvaga sadza. Ndafunga kuisa misungo, asi sango rizere mapere. Ndafunga kukanda manera, asi nzizi mune magakanje. Ndoenda hangu netsvimbo yangu huru ndinere mhembwe makava asati areredza rute. Ndoenda hangu muna Zambezi nechiredzo changu chine makonye marefu. Ndafunga kumukawo parutivi pachidziya. Ndafungawo kudana pachidairwa kunzi ,"Shewe." Ndafunga nzeve dzangu dzinzwewo chidawo changu. Ndafungawo kukudza dzinza, kumisa musha. Ndazvipira mbune kufudza danga. Ndazvipira hangu kuva mukuyu, Kudyiwa kasingaperi naMachuwa achimwira mvura. Gota ndoenda, Chitarira gotsi rangu kekupedzisira. Gota ndatenda, Wakayarutsa rushiye rukava Mambo.